WASANII wa filamu nchini wameonekana wakivutiwa na kazi anazozifanya msanii wa muziki wa kizazi kipya Ney wa Mitego huku baadhi yao wakionesha hisia za kuvutiwa naye kimapenzi.

Uchunguzi uliofanywa na mwandishi wa habari hii ulibainisha kuwa baadhi ya wasanii hao wameonekana kumzimikia Ney mbali na kazi zake anazofanya huku zikiwa zimebeba ujumbe wa moja kwa moja wa kuwaponda wasanii hao wa Bongo Movie.

Chanzo chetu cha habari kilieleza kuwa baadhi ya wasanii hao wamekuwa wakivutiwa na tungo za Ney wa Mitego huku wakiamini kuwa anachokiimba ni maisha halisi ya wasanii hao ambayo wanaishi kila siku, hivyo wamekuwa wakipenda ukweli wa nyimbo zake.

Aidha, imebainika kuwa mbali na nyimbo zake pia wasanii hao wanavutiwa na Ney kwa pozi zake zikiwemo swaga alizokuwa nazo na michoro yake ambayo amejichora katika mwili wake.

Kwa upande wake msanii nyota wa filamu Asfa Omary ameshindwa kuficha hisia zake baada ya kuweka wazi kumzimikia msanii huyo huku akiwa ana wazo la kutaka kumtongoza.

Msanii huyo hivi karibuni alikaririwa na gazeti la Majira kuwa, anamzimia Ney na yuko tayari kwenda kumtongoza na kuwa mume wake wa ndoa.

Kwa upande wake Ney, alipoulizwa na Maisha kuhusiana na kauli hiyo ya msanii huyo alisema kuwa kila mtu anahisia zake ila kwa upande wake hana nafasi ya kuwa naye kimapenzi.

Alisema kuwa, kupedwa na wasanii hao ni kitu ambacho yeye alikitarajia kwa kuwa anaimba ukweli na wapo baadhi ya wacheza filamu wanapenda ukweli huo.

"Mimi tayari nina mwanamke wangu, hivyo kwangu hana nafasi ya kuwa na mimi sijamzuia kunipenda ila kuishi na mimi tayari amechelewa sana," alisema Ney wa Mitego.

Hata hivyo pindi msanii huyo akiwa jukwaani mara kwa mara mashabiki wake wamekuwa wakivutiwa na Ney kwa kile wanachokiita swaga zake zipo juu.