Tamasha la muziki lililokuwa likifanyika katikati ya mji wa Des Moines jimboni Iowa nchini Marekani mwishoni mwa wiki iliyopita, lilikatizwa baada ya rapa Anthony T Smith maarufu kwa jina la Tone loc kuzirai akiwa jukwaani mara tu baada ya kumaliza wimbo,

Hata hivyo baada ya kupata fahamu, rapa huyo alikataa kupelekwa hospitali.Ilibidi tamasha likatizwe na maelfu wa washabiki waliokuwa na kiu ya kumsikiliza nguli huyu mwenye umri wa miaka 47 kuamiriwa kuondoka ukumbini hapo.

Polisi walithibitisha kutokea kwa tukio hilo na kusema ya kwamba madaktari wa huduma ya kwanza walifika ukumbini hapo lakini rapa huyo alikataa kwenda hospitali.

Hata hivyo msemaji wake hakuwa tayari kuizungumzia afya ya rapa huyo.Hii si mara ya kwanza kwa Tone Loc kuzirai jukwaani, kwani mwaka 1995 alipoteza fahamu wakati akishuhudia mechi ya mpira wa kikapu ya Los Angeles Lakers, vile vile mwaka 2009 akiwa katika tamasha katika mji wa Pensacola jimboni Florida, alizirai jukwaani kwa kile kilichodaiwa ni kushindwa kuhimili joto.

Loc mwenye sauti nzito ya aina yake, alitamba sana miaka ya 80 na vibao vyake maarufu kama Funky Cold Medina na Wild Thing, vilevile amecheza filamu mbalimbali kama vile  Ace Ventura akiwa na Jim Carrey na  Heat akiwa na mkongwe Al Pacino.